Saturday, April 27, 2024
AktualeSporti

Reagim i Vëllaznimit pas lojës me Ballkanin: Ky nuk është futboll!

vellaznimi Pas ndeshjes së fundit të këtij kampionati në mes të Ballkanit dhe Vëllaznimit që përfundoi me rezultat të barabartë 0:0, kryesia e klubit gjakovarë ka reaguar me një kumtesë të cilën po e botojmë në tersi.

Me shumë dëshirë, sot, një ditë pas mbylljes së edicionit të garave në Ligën e Parë të Kosovës në futboll, do të dilnim me një urim për të gjithë për rezultatet e arritura, por ajo që ndodhi në finish të ndeshjes Ballkani – Vëllaznimi të zhvilluar në Suharekë dhe pas përfundimit të saj na pamundëson të bëjmë një gjë të tillë. E themi këtë, pasi ajo që ndodhi me këtë rast, më së paku kishte të bëjë me futbollin, dhe i qiti hije shumë të keqe vetë garës, vetë kampionatit të kësaj lige, por edhe raporteve të mira sportive që tradicionalisht i kanë pasur këto dy klube.

Ne si klub, ishim të interesuar të shënojmë fitore, sepse ajo na garantonte titullin e kampionit në këtë konkurrencë, mirëpo nuk mund t’i bëjmë vërejtje nikoqirit për një angazhim të jashtëzakonshëm që të na pengoi të arrijmë qëllimin tonë. Pavarësisht se nuk kishin ndonjë motiv sportiv, pasi një pikë (apo edhe 3 sosh) nga kjo ndeshje nuk kishin ndikim në renditjen e tyre, është e drejtë e tyre që të angazhohen për të mos pësuar humbje. Mirëpo, ajo që ndodhi në çastet e fundit të ndeshjes dhe pas përfundimit të saj, nuk ishte e drejtë e tyre, përkundrazi sipas të gjitha normave sportive, ligjore dhe morale është e dënueshme. Një përleshje ndërmjet futbollistëve e nxitur nga një sjellje tejet josportive e lojtarit me nr. 16 të Ballkanit dhe pasiguria e gjyqtarit kryesor, është shfrytëzua nga një numër i shikuesve (6- 10 veta) që të futën në fushën e lojës dhe të sulmojnë lojtarët tanë. Çuditërisht kjo nuk ishte e mjaftueshme për gjyqtarin që të ndërpres ndeshjen, edhe pse këtë e kishte obligim sipas të gjitha rregullave të futbollit!

Situata eskaloi edhe më shumë pas përfundimit të ndeshjes, kur në drejtim të futbollistëve tanë, nga ana e shikuesve u hodhën gur, shishe dhe shumë gjësende të tjera. Ndërkaq, me të hyr në lokale, futbollistët vendës, të “ndihmuar” nga 4-5 persona civil (nuk e dimë se a ishin shikues apo anëtar të organeve të klubit nikoqir) u vërsulën në mënyrë barbare ndaj futbollistëve tanë, duke i sulmuar e rrahur në mënyrë të pamëshirshme. Në këto sulme, më së keqi e pësoi ekonomi ynë Albert Tuna, i cili, nga pasojat e sulmit, ishte i detyruar që në ambulancën e qytetit për rreth 1 orë të kërkoi ndihmë mjekësore. Pasojat e këtij sulmi, Tuna, vazhdon t’i ndjen edhe sot, gati 24 orë pas përfundimit të ndeshjes. Me këtë rast dëshirojmë të theksojmë se në ato momente, por edhe më vonë, nuk ka munguar angazhimi i pjesëtarëve të Policisë së Kosovës për të na mbrojtur, për çka i falënderojmë, por numri i tyre ishte i pamjaftueshëm për ta pasur sukses të plotë në këtë drejtim.

Në këtë mënyrë dëshirojmë të shprehim keqardhje dhe mllef që një ndeshje e cila ka mund të jetë spektakël sportiv, pasi të dy palët kishim arritur qëllimin (vendasit kishin siguruar ekzistencën, ndërsa na rikthimin në Super Ligë), u shndërrua në një sulm masiv, plotësisht të pakuptueshëm dhe të paarsyeshëm, ndaj nesh. Cili ishte motivi i suharekasve për të vepruar kështu, vetëm ata e dinë, ndërsa ne e dimë se ishim viktima të pamerituara.