Rotarianet kujdesen për ambijente të ngrohta të Qerdheve

Me donacionin e klubit Rotarian të Distriktit 7280 nga Pensilvania, Institucioni Parashkollor “Ganimete Terbeshi”  ka përfituar në renovimin e sistemit të ngrohjes vetanake të ambienteve të kopshtit të fëmijëve në Orize si dhe të kopshtit numër një “Deva”.

Ky renovim është jetësuar me mjete në vlerë prej 15 mijë dollar. Në ceremoninë e mbajtur me këtë rast, Diana Çarkaxhia, drejtoreshë e Drejtorisë së Arsimit ka falënderuar donatorët për këtë investim në edukimin parashkollor, ndërsa ka shprehur bindjen se ky investim do të mundësojë kushte edhe më të mira për këtë institucion vital për komunën e Gjakovës. Ndërkaq, Gazmend Hoxha, drejtor i institucionit parashkollor “Ganimete Tërbeshi” është shprehur mirënjohës për këtë donacion. Ai  tha se me këtë investim janë krijuar kushte të volitëshme për Qerdhet.

Në Gjakovë në kuadër të Qendres së Edukimit Parashkollor,  janë 7 Qerdhe me 600 vogëlush.

Në emër të Distriktit 7280 të Pensilvanisë ka përshëndetur përfaqësuesi Neshet Këpuska, i cili ka potencuar edhe realizimin e këtij renovimi falë angazhimit të drejtëpërdrejtë të Ruzhdi Bakallit, si anëtar i këtij distrikti. Ndërkaq, Selajdin Nagavci, kryetar i Rotari Klubit të Gjakovës, ka pohuar se ky donacion është në kuadër të aktivitetit të klubit për të ndihmuar arsimin, shëndetësinë si dhe sferat tjera jetësore në dobi të komunitetit.