Sot bëhen dy vite qyshkur Organizata Botërore e Shëndetësisë e shpalli virusin corona si pandemi globale. Zyrtarë të OBSH-së, me 11 mars 2020 u shprehen të shqetësuar për përmasat që virusi SARS-COV-2 kishte marrë. Për këto dy vite, në komunën e Gjakovës me këtë virus janë prekur gjithsejtë 11 mijë e 162 persona ndërsa janë shëruar gjithsejtë 10 mijë e 900 qytetarë. Kovidi ka sjellë mjaftë vështirësi për shumë familje gjakovare me pasojat e rënda. 228 persona e kanë humbur jetën nga ky virus, ndërsa të prekurit kanë bartur, pos gjendjes traumatike nga sëmundja, edhe koston e lartë të shërimit. Aktualisht në Gjakovë, sipas te dhenave tona janë 34 raste aktive, ndërkaq sipas Ministrise së Shëndetësisë raste active janë vetëm 21.
Në spitalin “Isa Grezda”, është vetëm një pacient, i cili po shërohet nga Covidi.
Për dy vjet rresht, mantelbardhët e institucioneve shëndetësore të mjekësisë primare, sekondare dhe terciare të Gjakovës u vunë në shërbim të pacientëve ndërkohë që Gjakovapress për këto dy vjet ishte dhe mbetet krah i informimit të rregullt dhe vetëdijësimit të qytetarëve për parandalimin e përhapjes së këtij virusi.
