Me ardhjen e bashkëatdhetarëve dhe me ndryshimin e sistemit për paisje me certifikata ka filluar edhe krijimi i tollovive në sportelet e administrates komunale. Këtë e pohon edhe Mark Komani, drejtor komunal për Administratë, i cili thotë se gjërat janë vështirësuar paksa edhe për qytetarët por edhe për punëtorët e administratës.
“Në fillim kemi pasur problem derisa jemi adaptuar me softverin e ri, por problem për shkak të sistemit po vazhdojmë të kemi edhe sot. Ky sistem kërkon që secili qytetar i lindur në Gjakovë të japë informata të shumta të cilat do të futen në bazën e të dhënave dhe do të lehtësojnë procedurat për të ardhmen. Kjo procedurë po merr më tepër kohë dhe si pasojë e kësaj edhe po ka mundësi të krijohen rradhë të gjata. Të mos harrojmë se përveç qytetarëve të Gjakovës tashmë si të lindur këtu na janë shtuar edhe shumë qytetarë të Malishevës, Rahovecit e Deçanit dhe edhe kjo po krijon shtesë të njerzve nëpër sportele”, ka thënë Komani.
Megjithatë, ai ka bërë të ditur se në ditët e ardhme kur pritet të shtohet edhe fluksi i bashkëatdhetarëve dhe rrjedhimisht edhe të rritet numri i njerëzve para sporteleve, po shikohet mundësia edhe për zgjatje të orarit të punës.
“E kemi bërë një kërkesë në ministrinë përkatëse që të na mundësojnë teknikisht të punojmë edhe për një orë më tepër sesa orari zakonshëm. Besoj se kjo do të na mundësohet dhe shumë shpejtë do të fillojmë me orarin shtesë. Gjithashtu, nëse e shohim të nevojshme si opsion mbetet edhe puna gjatë ditëve të shtuna”, ka thënë Komani, duke shtuar se megjithatë, situate në Gjakovë është shumë më e mirë se në komunat tjera të Kosovës.
Por, nga ana tjetër, qytetarët që pak dinë dhe duan të flasin për procedurat teknike e burokratike, kërkojnë që shërbimet e tyre t’i kryejn sa më shpejtë e sa më lehtë.
“Le t’i zgjidhin si të duan problemet e brendshme. Ne nuk duam arsyetime por duam që të kryejm punë shpejtë dhe të mos e humbasim ditën nëpër sportele”, thotë bashkëatdhetari Kadri Morina.
