Është bërë përurimi i veprës “Monografia për personat e rrëmbyer dhe të zhdukur gjatë luftës në Kosovë, Gjakovë, 24 mars 1999-12 qershor 1999” botuar nga Shoqata “Thirrjet e Nënave”, me autoret Nysrete Kumnova, Ferdeze Efendija dhe Sofie Haxhiavdyli-Tafarshiku, me kryeredaktor akademik Pajazit Nushi, dhe redaktorët akademik Esat Stavileci dhe Mevlyde Saraçi.
”Duke rrugëtuar për kaq e kaq vite, ju tani na sillni dokumentin e dhimbjes faktike, të atyre njerëzve të pambrojtur dhe të çiltër, të cilët ndonëse jetën e deshën në vendin e tyre, ata u vranë mizorisht dhe po aq mizorisht u transferuan mbetjet e tyre mortore në lokacione dhe vende nga më të ndryshmet” tha kryetarja Mimoza Kusari Lila duke potencuar edhe kurajon dhe këmbëngulësinë e shoqatës “Thirrjet e Nënave” për faktin se : Përderisa dikush filloi të lodhej dhe të dorëzohej, shoqata “Thirrjet e Nënave’ nuk ndaloi së kërkuari dhe punuari. Ky ngulmim, bëri që ne sot të kemi një vepër jashtëzakonisht të çmuar dhe e bën libër me interes shumë të madh.
Nysrete Kumnova, njëra prej autoreve të veprës dhe kryetare e shoqatës “Thirrjet e Nënave”, ka folur për aktivitetet, protestat, grevat, takimet, kërkesat, të nisura që pas luftës, e mëpas edhe me themelimin e shoqatës, deri tek botimi i kësaj vepre. Ajo ka spikatur se në këtë vepër janë 148 rrëfime tëfamiljarëve të goditur dhe tri rrëfime nga personat të cilët i kanë mbijetuar masakrave të shtatë dhe 10 majit të vitit 1999. Duke falënderuar për gjithë kontribuuesit e veprës, znj. Kumnova theksoi se si e tillë përmban histori të dhimbshme, me hakmarrje ndaj civilëve, duke përmbyllur fjalën e saj me kërkesat për personat e pagjetur.
I pranishëm ka qenë edhe ish presidenti i Kosovës, dr. Fatmir Sejdiu, që për masakrat e luftës së fundit vlerësoi se ishin akumulim i projekteve të mëhershme.
Prenkë Gjeta, kryetari i Komisionit Qeveritar për Persona të Pagjetur, pas akuzave që ka bërë ndaj Serbisë për fshehjen e gjurmëve, theksoi se deri më tani janë riatdhesuar 901 trupa nga Serbia, ndërkohë që mungojnë edhe 1600 persona të pagjetur.