Transportuesit gjakovarë nesër pjesërisht lëshojnë në qarkullim autobusët për Prishtinë, Prizren dhe Pejë

Transportuesit gjakovarë nga dita e shtunë,  do të kenë mundësi  të udhëtojnë me autobus në tri drejtime: Prishtinë, Pejë e Prizren. Kjo është bërë e ditur sot, pas një vendimi që kanë marrë në Shoqatën e Transportuesve të Komunës së Gjakovës. Kadri Rrahmani, kryetar i kësaj shoqate ka thënë sot për Radio Gjakovën, se kjo po bëhet e mundshme me të vetmin qëllim që tu dilet në ndihmë qytetarëve të komunës së Gjakovës, në këtë kohë pandemie. Në fakt sipas Rrahmanit shoqata e transportuesve të Kosovës ka pas një qëndrim  që  transporti të mos filloj pa u plotësuar disa kushte të transportuesve. Por duke pasur parasysh vështirësitë e qytetarëve sa i përket udhëtimit, është vendosur që të punojnë linjat tri herë në ditë  për Prishtinë me nisjet nga Gjakova në orën 8.00, 12.00 dhe 14.00 si dhe nga tri nisje për Prizren dhe Pejë.   

Ndryshe, transporti ndër-urban ishte pjesë e fazës së dytë të lehtësimit të masave ndaj COVID-19, që ka ndërmarrë Ministria e Shëndetësisë. Mirëpo ndërmarrjet  transportuese në këtë fazë, sipas një vendimi të Ministrisë së Infrastrukturës dhe Transporti, janë të obliguar të respektojnë disa kritere si masa mbrojtëse kundër përhapjes së infeksionit, distanca sociale, maskat dhe dorëzat.

Për këto vendime gjatë javës ka pasur reagime të shoqatës së transportuesve të Kosovës, të cilët nuk janë pajtuar me këto rregulla pasi kanë vlerësuar se ato janë të pamundura për tu aplikuar.