Sezonet e errëta duket se po marrin fund për Vëllaznimin. Klubi gjakovar është organizuar nga të gjitha anët, me qëllim rikthimin në Superligë pas disa sezoneve që i kaloi në Ligën e Parë. Kuqezinjtë po e dominojnë këtë ligë, duke prirë në tabelë me 23 pikë nga 10 ndeshje, prej tyre 7 fitore, 2 barazime e 1 humbje, shkruan gazeta Zëri me autor Moral Pozhegu.
Trajneri Arsim Gojani me stafin e tij e kanë komponuar një skuadër solide, me të cilën synon që ta rikthejë ekipin gjakovar në Superligë, aty ku me siguri e dëshirojnë edhe tifozët e qyteteve tjera.
“Disponimi tek lojtarët është shumë i mirë. E tillë është edhe atmosfera në klub. Ky sukses i deritashëm nuk është i rastësishëm, pasi kemi filluar të punojmë me këta djelmosha prej korrikut të vitit të kaluar. Sezoni i kaluar na ka shërbyer si përvojë, pasi e kishim një moshë mesatare prej 21,3 vjet dhe në momentet kyçe, kur duhej ta merrnin përgjegjësinë, u mungonte përvoja”, thotë fillimisht Gojani.
“Shpesh u kam thënë lojtarëve se e kemi një ekip të mirë dhe për nga kualiteti mund të krahasohemi edhe me skuadrat e Superligës. Secili i ka detyrat e caktuara dhe lojtarët kanë bërë shumë hapa përpara. Problemin më të madh tash mund ta kemi vetveten. Jemi në fillim të rrugës, duhet të vazhdojmë të punojmë, të qëndrojmë me këmbët në tokë dhe të mos vetëkënaqemi. Duhet ta mbajmë këtë atmosferë, të punojmë me koncentrim dhe në këtë mënyrë s’ka kush që na ndal”, shton ai.
Vëllaznimi e mposhti të mërkurën Vitinë 3:1, duke kaluar në fazën tjetër të Kupës së Kosovës dhe Gojani thotë se gjakovarët do të mundohen të luftojnë në të dyja frontet sa të munden, por nuk e fsheh faktin se Vëllaznimi është i fokusuar më shumë në rikthimin në Superligë.
Ndër të tjera, ai e sheh të udhës të ceket edhe nevoja e madhe që ka klubi për ndihmë, pasi kryetari i klubit, Shkëlzen Gashi, nuk mund t’i heqë të gjitha shpenzimet i vetëm, ngase klubi nuk është i privatizuar.
Andaj, Gojani i ka ftuar sponsorët, bizneset e mbi të gjitha Kuvendin e Komunës së Gjakovës që ta ndihmojnë sa më shumë klubin e Vëllaznimit, përcjellë Zëri.
Trajneri i ri gjakovar tregon se Vëllaznimi ka nevojë për përforcime gjatë janarit, pasi ka fond jo të mjaftueshëm të lojtarëve dhe është i bindur se Kuqezinjtë do të përforcohen, pasi pranvera do të jetë edhe më e vështirë për ta.
Gojani e ka falënderuar kryetarin Shkëlzen Gashi, i cili, sipas tij, po kontribuon për Vëllaznimin pa përfituar asgjë, vetëm për ta ndihmuar klubin e zemrës.
Ndërkohë, Gojani, ish-futbollist i njohur kosovar, i ka falënderuar edhe anëtarët tjerë të kryesisë, por edhe të tjerët që nuk janë pjesë e kryesisë, ish-futbollistë të klubit, që po kontribuojnë me të madhe, po ashtu edhe 12 trajnerët e grupmoshave të reja, si dhe tifozët gjakovarë, që bashkërisht po kontribuojnë në rikthimin e Vëllaznimit në Superligë.
“Vëllaznimi është ushqim shpirtëror i gjakovarëve, po mundohemi t’ua sjellim disa çaste të mira atyre pas problemeve që kanë dhe vuajtjeve që kanë përjetuar”, ka thënë në fund Gojani, i cili ceku se futbollistët po i marrin pagat me rregull çdo muaj.
