Vëllaznimi sa për të luajtur, Luftëtari synon Ligen e parë
Të dielen në terrenet e futbollit në Kosovë, me ndeshjet e fundit të stinorit pranveror bie perdja e kampionatit të superligës së futbollit kosovar, që për Vëllaznimin ishte një kampionat i varfër sa i takon rezultateve. Kjo bëri që skuadra gjakovare të largohet nga kjo elitë dhe për një vit ti bashkohet skuadrave të ligës së parë. Ndeshjen e fundit Vëllaznimi e zhvillon në stadiumin e qytetit në Gjakovë nesër prej orës 17.00 ku për ballë do të ketë Hajvalinë. Derisa Vëllaznimi i pozicionuar në pozitën e njëmbëdhjetë ka humbur statusin e anëtarit të superligës, klubi i futbollit Luftëtari i Brekocit, i pozicionuar në pozitën e dytë në tabelën klasifikuese të Ligës së Dytë futbolistike të Kosovës, do të zhvillojë javën e ardhshme ndeshjen e barazhit për tu inkuadruar në Ligën e parë futbolistike të Kosovës. Inkuadrimi i Luftëtarit në Ligën e parë do të jetën një nga sukseset më të mëdha të këtij klubi nga komuna e Gjakovës.