Akulli në rrugë telashe për këmbësoret dhe shoferët

Pas borës dhe acarit që ka shkaktuar vende-vende edhe shtresa të mëdha akulli është vështirësuar qarkullimi normal posaçërisht nëpër rrugët dytësore të qytetit si dhe nëpër rrugët e zonave të thella malore. Anipse në rrugën kryesore të qytetit, në atë Nëna Terezë, pjesa më e madhe e trotuarit është e pastruar nga bora dhe akulli, kjo nuk mundë të hetohet nëpër rrugët mjaft frekuentuese brenda qytetit ku akulli është ende prezent. Në spitalin rajonal Isa Grezda thanë se reparti I Ortopedisë ka pasur mjaft punë me pacientët që kanë pësuar nga rrëshqitjet. Dëmtime të nyjave të duarve dhe të këmbëve kanë qenë ankesat më të mëdha të pacientëve që kanë kërkuar ndihmë në këtë qendër spitalore, prandaj mjekët këshillojnë këmbësorët për një kujdes shumë të shtuar.

Në anën tjetër vështirësi po kanë edhe drejtuesit e automjeteve. Si pasojë e të reshurave të borës dhe pranisë së ngricave në rrugët regjionale dhe lokale të Gjakovës ka pasur vetëm dy aksidente trafiku. Sipas togerit Albin Sahatqiu,  komandant i Policisë së trafikut në Drejtorin Rajonale të Policisë në Gjakovë, në të dyja rastet e ndodhura pra tri ditësh  nuk pasur pasoja fatale. Në njërin aksident ka pasur lëndime të lehta trupore ndërsa në të dytin vetëm dëme materiale. Sahatqia këshillon shoferët për ngasje të kujdesshme duke iu përshtatur rrethanave në rrugë, ndërkohë që pajisjet dimërore janë të domosdoshme.