Sot filloi viti i ri akademik 2020/2021, edhe në Universitetin “Fehmi Agani” në Gjakovë, në institucionet e arsimit të lartë, për studentët e vitit të dytë, tretë dhe të katërtë, kurse për rreth 400 studentët e rinj të vitit të parë do filloi me vonesë. Fillimisht do të jenë “brucoshët” e Fakultetit të Filologjisë, Programi Gjuhë dhe Letërsi Shqipe dhe Fakulteti i Edukimit, Programi Fillor dhe Programi Parashkollor. Ndërkaq për drejtimet e Fakultetit të Mjekësisë, Këshilli Shtetëror i Cilësisë ende nuk ka dhënë përfundimet dhe vlerësimet.
Me këtë rast, rektori, Artan Nimani duke ju uruar studentëve për një fillim të mbarë të procesit mësimor, ka thënë se ky viti i ri akademik na gjen në një situatë ndryshe, si pasojë e pandemisë Covid-19.
“Viti ri akademik 2020/2021 për studentët ekzitues të Universitetit të Gjakovës “Fehmi Agani”, na gjen në një situatë ndryshe, si pasojë e pandemisë Covid-19. Prandaj, studentët dhe i gjithë stafi i UGJFA-së me përkushtim të plotë do të zhvillojnë procesin mësimor, duke i respektuar vendimet e MASh-it dhe rekomandimet e institucioneve shëndetësore-IKShPK-së.
Me angazhimin e të gjithëve do të kontribuojmë në ruajtjen e shëndetit për njëri-tjetrin dhe duke besuar në përkushtimin dhe suksesin e juaj, ju ftoj që gjatë studimeve të shpenzoni gjithë energjinë tuaj në kërkim të standardeve më të mira të studimit dhe etikës akademike”, ka uruar Nimani.
