Ministri i Kulturës, Rinisë dhe Sportit, Memli Krasniqi priti sot grupmoshat U-12 të klubit të futbollit Gjakova, të cilët në turneun ndërkombëtar Gothia Cup në Suedi, të mbajtur para disa javësh, kanë zënë vendin e parë në kategorinë U-12. Në këtë turne kanë marrë pjesë qindra ekipe, në mesin e të cilëve edhe shumë skuadra të njohura evropiane. Futbollistët janë shoqëruar edhe nga trajnerët dhe koordinatorët e klubit,ka njohtuar “koha net”.
Krasniqi përgëzoi futbollistët për suksesin e lartë të treguar në këtë turne, si dhe trajnerët dhe gjithë stafin për punën e vazhdueshme dhe garat e fituara. Ai tha se paraqitja e këtyre të rinjve në këtë turne ka qenë shumë mbresëlënëse dhe ka bërë krenar të gjithë sportdashësit e Kosovës. Ai tha se gjeneratat e reja janë një e ardhme e ndritur e Kosovës dhe se ata do të kenë më shumë mundësi që ta përfaqësojnë denjësisht në çdo garë Kosovën, por edhe të arrijnë suksese personale. Sipas njoftimit të MKRS, kjo ministri ka shumëfishuar mbështetjen për sportin, duke investuar në krijimin e kushteve më të mira për stërvitje dhe zhvillim të garave, si dhe për shpërblime për sportistët kulmorë, por edhe ndarjen e bursave për shpresat olimpike. Ministri ka përmendur se prioritet nacional është sporti shkollor, pasi përmes tij masivizohet sporti, promovohet shëndetit dhe promovohen talentet në shumë sporte që në të ardhmen të jenë pjesë e klubeve dhe përfaqësueses së Kosovës.
MKRS, tha ministri Krasniqi, për herë të parë në këto vitet e fundit ka investuar në përmirësimin e infrastrukturës sportive, por shtoi se në këtë drejtim ka ende shumë sfida. Ai ka premtuar se MKRS edhe gjatë viteve të ardhshme do të vazhdojë të mbështesë prezantimin ndërkombëtar të sportistëve kosovarë të të gjitha grupmoshave.
Koordinatori i klubit gjakovar, Gëzim Daka falënderoi ministrin për interesimin e vazhdueshëm për sportin. Daka tha se prezantimi në turne ka ndikuar që futbollistët të fitojnë më shumë përvojë dhe të rritet interesimi nga shumë klube të botës për futbollin në Kosovë. Futbollistëve, ministri Krasniqi ju ka dorëzuar si dhurata rekuizita sportive.
