Pas një pasiviteti që kishte kapluar radhët e skuadres gjakovare të futbollit, brenda pushimit mes dy kampionateve (ndoshta per shkak te Kampionatit boteror!) kur futbolldashësit e zjarrtë gjakovarë druanin për fatin e Vëllaznimit, duket se gjërat në klubin me traditë Vëllaznimi kanë filluar të ecin. Blerim Mula nuk është më kryetrajner. Ai ka përfunduar me sukses misionin e tij duke e sjell Vëllaznimin në elitën e futbollit kosovar. Në stolin e shefit të shtabit teknik të KF Vëllaznimi është trajneri i sprovuar dhe i dëhsmuar për suksese, Genc Hoxha. Pas bisedave disa ditëshe, të enjten pasdite u zyrtarizua marrëveshja ndërmjet Vëllaznimit të Gjakovës dhe ish kapitenit e ish trajnerit të këtij klubi, Genc Hoxhës, ka njohtuar kryesia e klubit.
Sipas kësaj marrëveshjeje, Genc Hoxha do t’i prijë skuadrës gjakovare në edicionin ri të garave të Super Ligës së Kosovës në futboll, i cili, siç ka vendosur KE i FFK-s, do të fillon më 16 gusht. Duhet kujtuar se Vëllaznimi, pas një vit garash në ligën e parë të Kosovës, duke e fituar titullin e kampionit në atë konkurrencë është rikthyer në elitën e futbollit kosovar. Marrëveshja me njërin prej trajnerëve më të suksesshëm të futbollit kosovar, ëshët zyrtarizuar të enjten pasdite. Të përkujtojmë se Genc Hoxha rikthehet në radhët e Vëllaznimit pas plotë 6 vitesh. Herën e fundit, ai, skuadrës gjakovare i ka prirë në kampionatin 2007-2008, kur ajo kishte fituar Kupën e Kosovës dhe titullin e nënkampionit të Kosovës. “Trajneri i ri i klubit, Genc Hoxha, takimin e parë më futbollistët dhe fillimin e përgatitjeve për kampionatin e ri, e ka caktuar për të shtunën më 19.07.2014 në orën 11 në stadiumin e qytetit. Në ndërkohë Hoxha do të përcaktohet për bashkëpunëtorët e tij në shtabin teknik të skuadrës”, thuhet në njohtimin e Kryesisë së K.F.”Vëllaznimi” në Gjakovë.
