Gjakova bëhet me fabrikën e çantave

Në Gjakovë, të hënën  është hapur  fabrika për prodhimin e çantave “Key One”, investim ky i një kompanie të fuqishme italiane  me ndërmjetësimin e Ministrisë së Tregtisë dhe Industrisë (MTI), gjegjësisht Agjensionit për Promovimin e Investimeve (APIK), që funksionon në kuadër të kësaj ministrie,

Sandro Santamaria, njëri nga tre investitorët e kësaj fabrike tha se  në fazën e parë janë investuar rreth 150 mijë euro, ndërsa janë punësuar 14 punëtorë, por kapacitetet e investimit do të rritet dukshëm në të ardhmen e afërt.

“Ne si investitor jemi të kënaqur me këtë investim, i cili deri me tani ka arritur në rreth 150 mijë euro. Planet tona janë që në një periudhë 2 vjeçare të investojmë edhe rreth 500 mijë euro tjera dhe ta ngrisim kapacitetin e punëtorëve në 200”, ka thënë Santamaria. I pyetur se pse ai dhe ortakët e tij kanë vendosur të investojnë në Kosovë,  tha se këtë e kanë bërë për shkak të fuqisë së lirë të punëtorëve, efikasiteti dhe seriozitetit të tyre, por edhe për shkak të pozitës mjaft të përshtatshme gjeografike të vendit tonë.

Në inaugurimin e fabrikës kanë marrë pjesë edhe Ministrja e MTI-së Mimoza Kusari – Lila dhe ambasadori Italian në Kosovë Michele Giffoni. Ky i fundit  theksoi se është i kënaqur që një kompani italiane ka vendosur të investojë në Kosovë, ndërsa ka paralajmëruar se edhe të tjerë afarist janë të interesuar ta ndjekim të njëjtën rrugë.

“Qëllimi i këtij investimi ka qenë që në Kosovë të barten eksperianca nga Italia, duke e bërë prodhimin e këtyre produkteve dhe duke i eksportuar ato në Evropë. Më duhet të them se pas këtij investimi, janë lajmëruar edhe shumë afaristë të fuqishëm Italian, të cilët kanë shprehur dëshirën e tyre për të investuar në prodhim, kryesisht të tekstilit dhe produkteve ushqimore. Mendoj se ky është një realitet i mirë edhe për Italinë e sidomos për Kosovën”,  tha ambasadori Giffoni.

E më e kënaqura në këtë mes u duk të jetë ministrja Mimoza Kusari – Lila, për faktin se ka arritur që një investim të tillë ta sjellë në qytetin e saj.

“Jam vërtetë e kënaqur që këto çanta të prodhuara në Gjakovë, në Republikën e Kosovës, do të shiten gjithandej në Evropë me markën Made In Kosovo. Ky është me të vërtetë një sukses i madh, por që në të vërtetë duhet të rritet edhe më në të ardhmen jo vetëm me këtë investitor por edhe me investitor tjerë nga e tërë bota. Ky në fakt edhe është një prej fokuseve të politikave të qeverisë së Kosovës për nxitjen e eksportit e investimeve të huaja në Kosovë dhe rrjedhimisht edhe krijimin e vendeve të reja të punës”, ka thënë në fjalën e saj Kusari – Lila.

Fabrika KeyOne, është tanimë në biseda të afërta për prodhimin e çantave për markat e mirënjohura si Max Mara, Prada, Burberry dhe kompani tjera.