Mbahen Ditët e agrobiznesit në Gjakovë

Zonës së quajtur dikur si Lama e drithit, ku behej tregu në Crashinë e Vjetër të Gjakovës të premten I është këthyer gjallëria . Dhjetëra shtëpiza druri janë vendosur për të ekspozuar produktet ushqimore. Nën tingujt e muzikës,  kalimtarët vizitorë patën rastin të përcjellin nga afër produktet kosovare të disa firmave të sukseshme. Në fakt me organizim të Ministrisë së Bujqësisë dhe Komunës së Gjakovës, është bërë hapja e ditëve të agrobiznesit “Kosova 2014”. Ky aktivitet do të mbahet për dy ditë rradhazi. Në ditën e parë, e cila ka nisur sot me panairin e ushqimeve, dhe punëtorinë në Qendrën innovative “Jakova” ku u debatua per prpblemet në shumë degë të bujqësisë,  kryetarja Mimoza Kusari Lila ka theksuar rëndësinë që ka ky panair i sotëm ku ekspozohen produkte ushqimore vendore. Për hapjen e këtij panairi tek “Lama e Drithit”, ajo ka thënë se qëllimisht është bërë kjo zgjedhje, pasi më parë edhe ka qenë vend i dedikuar për këso produktesh.

” Promovimi i produkteve tona, gjithnjë ka qenë motiv thelbësor i imi, pasi e dimë jo vetëm rëndësinë porse edhe nevojën imediate që ato të mbështetën sa më shumë  në mënyrë që në treg të kemi dhe ne konkurrencën tona. Këtë e themi pasi edhe ne kemi çfarë të prodhojmë dhe të plasojmë. Nuk është se mungojnë faktorët, qoftë nga infrastruktura humane apo infrastruktura të tjera bazike për prodhimtari të tillë, porse neve na nevojitet të ofrojmë një stimulim edhe më të madh. Sidomos, kjo duhet të arrihet nga niveli qendror qeverisës, porse edhe ai lokal ka hisen e saj për stimulim dhe mbështetje. Nga ky aspekt i fundit, pra i qeverisjes lokale, ky është edhe imperativ i yni sepse e dimë farë mirëse çfarë resursesh disponojmë dhe se çfarë mund të kultivojmë. Kemi kënaqësinë e veçantë që sot shohim të ekspozuara produkte ushqimore që mbajnë etiketën e prodhimtarisë së shtetit tonë. Këtu dëshmohet se kemi pemtari, perimtari, blegtori dhe industri ushqimore kualitative dhe joshëse që mund të gjejnë hapësirë jo vetëm për konsum të brendshëm por ta paktën edhe në rajon. Gjithashtu shprehen potenciale dhe mundësi që këto sektore të shtohen, të rriten dhe të zhvillohen” ka theksuar kryetarja Mimoza Kusari Lila, e cila gjithashtu ka pohuar se do të shtohen grantet dhe se tani më veç do të arrihet granti në shumë prej 30 mijë euro për sektorin e bletarisë.

Në ditën e dytë të ditëve të agrobiznesit “Kosova 2014”, të shtunën, në Korenicë të Gjakovës do të mbahet panairi i gjedhit.