Edhe gjakovarët të enjten mbrëma nga ora 20.00 për 5 minuta kanë protestuar nga ballkonet e shtëpive , për të kërkuar reflektim nga të gjitha partitë politike dhe udhëheqësit institucional në Kosovë ndaj situatës së krijuar dhe panikut që është duke e përjetuar çdo shtetas i Kosovës. Revolta dhe protestimi prej ballkonit duke krijuar zhurmë me çelësa, tengjere e plastika ishte kërkesë që në një kohë kur të gjithë, pra edhe politikanët, do të duhej të ishin të bashkuar dhe të unifikuar që të punojnë në menaxhimin e situatës të shkaktuar nga pandemia COVID-19.
Edhe sonte do të mbahet “Protestë n’ Ballkon” sikurse mbrëmë. Sipas njoftimit për media, protesta do të mbahet në orarin e njëjtë, nga ora 20:00. “Qytetarët e Republikës së Kosovës kurrë nuk kanë qenë më të revoltuar se tash, andaj ne do të vazhdojmë me natën e dytë të “protestojmë n ballkon” duke iu drejtuar skenës politike se qytetarët dhe përgjegjësia publike duhet të jetë interesi parësor dhe i vetëm. Kërkojmë që krerët e koalicionit qeverisës, Presidenti dhe partitë opozitare të bashkohen për mobilizim të situatës së krijuar nga pandemia COVID-19 dhe jo të fokusohen në interesat partiake dhe personale të tyre”, thuhet në njoftim.
