Anipse në rrethana të çrregulluara nga pandemia Covid, më në fund u mbajt testi i maturës ku të gjithë 26 maturantët e shkollës së muzikës, “Prenk Jakova” kaluan me sukses.
Tek shkollat me numër të madh maturantësh, tradita e suksesit, angazhimit të nxënësve dhe mësimdhënësve të gjimnazit, ka reflektuar edhe me këtë rast. Maturantët e “Hajdar Dushi-t” edhe këtë vit kanë arritur rezultatin më të lartë në nivel të komunës. 91.75 % e tyre kanë arritur të kalojnë këtë test, që është rreth 21 % më i lartë se rezultatet e maturantëve në nivel të komunës së Gjakovës.
Në nivel të komunës nga 1 mijë e 296 maturant sa i janë nënshtruar këtij testi, 912 apo 70.37 % kanë dalë me rezultate pozitive.
Veç gjimnazit “Hajdar Dushi”, mbi mesataren e komunës kanë dalë edhe nxënësit e shkollës së mesme të mjekësisë “Hysni Zajmi”. Nga 343 maturantë sa i janë nënshtruar testit, 260 apo 77.55 % kanë përfunduar me sukses.
Ndërkaq me rezultat të plotë kanë dalë edhe 26 nxënësit e shkollës së muzikës, “Prenk Jakova”.
Ndërkaq, në shkollat tjera të mesme, rezultatet nga ky test ka qenë nën mesataren e nivelit komunës.
Në shkollën e mesme ekonomike “Kadri Kusari” me rezultat pozitiv kanë dalë 42.12 % e maturantëve, ndërkaq në shkollën e mesme teknike “Nexhmedin Nixha”, testin e kanë kaluar 37 maturantë, apo 41.01 %.
Sukses më i dobët është shënuar në gjimnazin “Asllan Berisha” në Rogovë, ku testin e kanë kaluar vetëm 13 maturantë, apo 31.1 % e atyre që kanë pasur të drejtë në testim. Maturantët që nuk e kanë kaluar testin në afatin e parë e kanë edhe një mundësi më 10 tetor, ku është paraparë të mbahet testi i dytë.