PDK hapi fushatën në Gjakovë

Në tubimin qendror që u mbajt të mërkurën pasdite, në Pallatin e Kultures në Gjakovë kryeministri Thaçi ka premtuar se brenda mandatit të ardhshëm katër vjeçar, do ta lidhë Gjakovën me autostradë me Mitrovicën dhe Prizrenin, konkretisht me rrugën e kombit.

“E kemi bërë studimin, zotimin e mjeteve e shumë shpejtë do ta marrim edhe vendimin për ndërtimin e një korridori të autostradës që do të fillojë nga qyteti i bashkuar i Mitrovicës, përgjatë Runikut, Istogut, Pejës, Deçanit, Gjakovës, Xërxes deri në Prizren për tu lidhur me rrugën e kombit. Dikush mund të thotë se ky është projekt i parealizueshëm, por kështu kanë thënë edhe për autostradën nga Vërmica që tashmë e ka kaluar Prishtinën, kështu kanë thënë edhe për autostradën Prishtinë – Shkup, por autostrada po fillon muajin e ardhshëm. Pra, edhe ky projekt nga Mitorvica, do të fillojë e do të përmbyllet deri në përfundim të mandatit të parë të Hajdar Beqës si kryetar i Gjakovës”, ka thënë Thaçi mes brohoritjeve të simpatizantëve të PDK-së të mbledhur në Pallatin e Kulturës “Asim Vokshi” në Gjakovë.

Duke ftuar Gjakovarët që ta votojnë PDK-në, Thaçi ka thënë se kandidati për kryetar të komunës Hajdar Beqa, është i vetmi njeri që mund ta bëjë atë që nuk e kanë bërë të tjerët deri me tani në Gjakovë.