Rreth 200 shtëpi me 1.000 banorë që jetojnë në kodrën e Çabratit dhe rrëzë tij, tash e tutje nuk do të kenë problem me ujë të pijes. Këtë problem ua ka zgjidhur rezervari i ujit I ndërtuar në kodër të Çabratit, dhe i cili është inauguruar të enjten nga kryetari i komunës Pal Lekaj dhe kryeshefi ekzekutiv i kompanisë “Radoniqi” Ismet Ahmeti.
Më të lumturit me këtë projekt padyshim që ishin qytetarët, të cilët thanë se tashmë jeta e tyre do të jetë shumë më cilësore. Banorët e kësaj zone, Halit Muhaxheri dhe Agim Deva thanë se gëzim më të madh nuk kemi përjetuar më parë.
“Gjendja me furnizim që 18 vjet sa jam banorë I kësaj lagje në Cabrat, ka qenë mizerje. Nuk kemi pasur ujë as për nevojat minimale. Kjo është një ditë e lumtur për ne”, tha Muhaxheri. Ndërkaq Deva theksoi se për këto 60 vjet të jetës së tij, momenti I zgjidhjes së problemit me furnizim me ujë të pijes, I është dukur si më madhori.
“ Uji pas mesnate na ka ardhur në krojet tona sa një pikë loti. Nuk kemi mundur të kryejmë shërbimet më elementare me ujin e deridjeshëm. Tash kemi me bollëk, na është ndryshuar për të mirë edhe përditshmëria dhe jemi gëzuar gjithë familja, gjithë lagja jonë” theksoi Deva.
Në ceremoninë e inaugurimit, kryetari Lekaj ka thënë se po ndihet mirë që bashkë me kompaninë “Radoniqi” kanë arritur ta zgjidhin këtë problem të hershëm të qytetarëve:
“Nuk është vlerë e madhe investime sa është projekt I rëndësishëm dhe jetik për banorët e kësaj lagje” tha Lekaj duke falënderuar drejtorin e kompanisë Radoniqi që ka realizuar në bashkëpunim me komunën këtë projekt të rëndësishëm.
Ai është shprehur i lumtur që në fytyrat e banorëve të kësaj lagje ka parë gëzimin për këtë projekt të furnizimit me ujë të pijes.
Nga ana tjetër, kryeshefi ekzekutiv i kompanisë “Radoniqi”, ka thënë se kompania që ai e drejton do të vazhdojë që edhe në të ardhmen të angazhohet për krijimin e kushteve më të mira për qytetarët, gjegjësisht konsumatorët e kompanisë.
“ I kam mirëkuptuar kërkesat e banorëve që kanë qenë në hallë të madh me mungesën e ujit të pijes, prandaj si kompani në bashkëpunim me Kuvendin Komunal kemi investuar përgjysmë në ndërtimin e këtij rezervuari që ka kapacitet të mjaftueshme për zgjerim të mëtutjeshëm. Edhe në të ardhmen do të jemi në shërbim të qytetarëve për të ofruar shërbimet e kompanisë “Radoniqi”” tha Ahmeti.
Ndërtimi i këtij rezervuari në kodër të Çabrtatit në lartësinë mbidetare rreth 400 metra që furnizohet përmes pompave dhe rrjedhë në krojet e qytetarëve me rënie të lirë, ka kushtuar rreth 150 mijë euro, ndërsa është bashkëfinancuar nga komuna e Gjakovë dhe kompania “Radoniqi”.