Serbia po vazhdon të sfidojë Kosovën në çdo aspekt. Një prej sfidave kryesore del të jetë ministri Aleksandër Jabllanoviq, i cili shtetit i referohet si Kosova e Metohia. Ministri për Kthim dhe Komunitete, në qeverinë e Kosovës Aleksandër Jabllanoviq, ofendoi rëndë protestuesit në Gjakovë, që nuk lejuan pelegrinët serb të hyjnë në kishë. Ai në orët e mbrëmjes të së shtunës, pasi kishte përfunduar protesta e familjarëve të personave të zhdukur, bëri një skandal, pasi i quajti egërsira të gjithë ata protestues.
Reagon komuna
Është për keqardhje qasja e ministrit Jabllanovic që në ditët e para të detyrës së tij në raport me qytetarët e vendit të cilit i shërben. Deklarata ofenduese ndaj qytetarëve të Komunës së Gjakovës tregon më së miri se si politikanë të ndryshëm nuk kanë lidhje me realitetin e krijuar që 16 vite në Kosovë, e aq më pak vet ministri nuk është i interesuar të kontribuoj në paqe dhe përmirësim të marrëdhënieve.
Sikur ti interesonte kjo situatë ministrit Jabllanovic, atëherë do vinte në Gjakovë dhe të shikonte varrezën më të madhe në Republikën e Kosovës dhe të njihej më mirë me realitetin e Komunës së Gjakovës.Përkundër të gjitha këtyre, Komuna e Gjakovës ashtu sikur kupton ushtrimin e të drejtës fetare, njëjtë respekton edhe të drejtën e protestës dhe të pakënaqësisë që shprehet në mënyrë demokratike, pasi kjo e drejtë i sigurohet qytetarëve edhe me Kushtetutën e Republikës së Kosovës. Konsiderojmë se avancimi i urrejtjes përmes kësaj gjuhe do garantoj vështirësi të reja dhe në të njëjtën kohë do prodhojë tensione tjera të panevojshme.
Lekaj: egërsirat ishin dikur në Gjakovë
Ish kryetari i Gjakovës, tash deputeti i AAK-së, Pal Lekaj, i ka shkruar një letër të hapur kryeministrit të Kosovës, Isa Mustafa, në lidhje me deklaratën e Ministrit për Kthim, Aleksandër Jabllanoviq. E këtij të fundit i është drejtuar duke i thënë se egërsirat ishin dikur në Gjakovë.
“Egërsirat ishin dikur në Gjakovë, dhe ikën bashkë me krimin e tyre. Tani ka familjarë që dëshmuan duke u mbrojtur nga krimi, duke e mbrojtur civilizimin, ngase, egërsirat lanë gjurmë të këqija dhe tani shumë nga ata vijnë pas fërkemeve të vetë”, ka shkruar Lekaj. “Familjarët e viktimave të luftës në Gjakovë nuk janë egërsira, por janë të viktimizuar nga egërsirat. Gjakovën e lanë tokë të ndezur, të shkatërruar dhe në vajë e kërkim të shumë shqiptarëve që quhen të zhdukur. Gjakovën, egërsirat e kthyen në barbari që kishte përfunduar që nga koha e mesjetës”, ka shtuar më tej ai.
Lekaj thotë se medialisht, para krejt botës, serbët po tregojnë se nuk ndryshojnë në asnjë aspekt, ndaj shqiptarëve.
Krasniqi e quan Jabllanovicin mbeturinë të Millosheviqit në Kosovë
Duke e parë atë që po ndodh rreth nesh që sa vite, nuk ka dilema, një pjesë e njerëzve të botës sonë janë dehumanizuar, thotë ish kreu i Kuvendit Jakup Krasniqi, sipas të cilit bota e jonë ka nevojë për ngritje të humanizmit e të solidaritetit.
“Është shumë njerëzore, që pas një sulmi terrorist mbi një medie franceze, bota është solidarizuar me viktimat e fjalës së lirë. Është shumë e natyrshme që edhe shqiptarët janë solidar me Francën dhe francezet, pasi edhe ata ishin solidar me ne, me popullin tonë kur regjimi i Millosheviqit ushtronte gjenocid mbi popullin shqiptar të Kosovës. Ne, nuk do ta harrojmë kurrë solidaritetin e botës demokratike me mbështetjen që na dhanë për lirinë e demokracinë tonë”, ka shkruar Krasniqi, në një opinion të tij.
Megjithatë, sipas Krasniqit, është tepër e dhimbshme që në Kosovën e lirë, të pavarur e sovrane, në institucionet e saja ka mbeturina të Millosheviqit, të cilat pa fije turpi, bëjnë krimin e ri mbi viktimat e politikës serbe të gjenocidit.
“Askush e më askush i veshur me petkun e qeveritarit të Republikës së Kosovës, nuk e ka të drejtën t’i fyej nënat gjakovare, ato nëna që edhe 15 vjet pas luftës nuk i din ku i kanë më të dashurit e tyre. Para këtij akti barbarë verbal, nuk duhet të hesht Kryeministri i Kosovës e as zyrtarët e lartë te Kosovës. Pse ata po heshtin?! Ata nuk duhet t’i shtien veshët në lesh, sikur rreth tyre nuk po ndodh asgjë”, ka shkruar Krasniqi.
