Ministri i Arsimit, Shkencës dhe Teknologjisë Ramë Buja ka thënë se lajmi për hapjen e Universitetit Publik në Gjakovë, i cili do të fillojë së funksionuari me 1 tetor të këtij viti është një lajm i mirë që duhet t’i gëzojë të gjithë pa përjashtim, sepse po krijohet edhe një vatër e rëndësishme arsimore, në të mirë të të gjithë qytetarëve jo vetëm të Gjakovës por edhe më gjërë. Bile ai ka thënë se këtë lajm të mirë nuk mund ta prishin as zërat kundër këtij procesi.
“Kemi dëgjuar që po thonë se po hapim universitete mahallash e universitete lagjes. Unë i kuptoj këto zëra e këto dërdëllitje, por nuk pajtohem me to, sepse ne po i bëjmë këto institucione aty ku duhet dhe aty ku duan, dinë dhe munden t’i realizojmë më së miri proceset në fjalë”, ka thënë Buja.
Ai këtë deklaratë e ka bërë të marten në Gjakovë, gjatë ndarjes së 2654 licencave për punë, për mësimdhënësit e Regjionit të Gjakovës, regjion që përfshinë edhe komunat e Rahovecit e Malishevës.