Me rastin e përfundimit të maturës, kryetarja e komunës së Gjakovës, Mimoza Kusari-Lila, ju ka uruar të gjithë maturantëve gjakovarë, suksese në vazhdimin e procesit të arsimimit të mëtutjeshëm, Në urimin e znj. Kusari Lila mes tjerash thuhet:
“Me ndjesi të posaçme ju përcjell urimet më të mira për përfundimin e suksesshëm të maturës. Me përfundimin e një kapitulli të rëndësishëm, ju po e hapni kapitullin tjetër të jetës tuaj, i cili do të jetë i mbushur me sfida, dështime, emocione dhe suksese nga më të ndryshmet.
Si kryetare e Komunës së Gjakovës, uroj të keni kaluar një sistem të arsimit i cili ju ka përgatitur për t’u ballafaquar me jetën, jo shumë të lehtë në Kosovë. Por, edhe nëse sistemi ynë i arsimit ka dështuar diku, ndërsa në familje nuk i keni pasur kushtet të realizoni planet tuaja deri më tani, mos u merakosni se nuk jeni vetëm. Ka pasur gjenerata të tëra në Kosovë, që mësimin e mbanin në kushte ende më të vështira, nën kërcënimin e armëve dhe dhunës dhe prapë mbijetuan. Jeta nuk është e lehtë, por është e bukur dhe duhet të jetohet çdo moment i saj. Për ju të cilët do të vazhdoni studimet, uroj dhe shpresoj t’u shkojë çdo gjë mbarë, ndërsa për ju të cilët kërkoni punë, uroj ta gjeni sa më shpejt dhe të bëni zgjidhje tjera për avancimin tuaj në karrierë”, ka thënë në urimin e sajë kryetarja Kusari-Lila, drejtuar maturantëve gjakovarë.
